ធ្វើការពេលកំពុងសិក្សា៖ ម៉ោងធ្វើការ និងសិទ្ធិការងារជាមួយវីសាសិស្សនៅនូវែលសេឡង់

បានបោះពុម្ព៖ 10 កក្កដា 2026

ប្រសិនបើអ្នកកំពុងសិក្សានៅប្រទេសនូវែលសេឡង់ ការធ្វើការក្រៅម៉ោងគឺជាវិធីដ៏ល្អមួយដើម្បីជួយទ្រទ្រង់ការចំណាយរស់នៅរបស់អ្នក។ ប្រសិនបើអ្នកធ្វើការក្នុងវិស័យដែលពាក់ព័ន្ធនឹងមុខវិជ្ជាសិក្សារបស់អ្នក វាក៏អាចជួយឱ្យអ្នកទទួលបានបទពិសោធន៍ការងារក្នុងវិស័យនោះ និងបង្កើតបណ្ដាញវិជ្ជាជីវៈផងដែរ។ ការងារក្រៅម៉ោងក៏ជាឱកាសដ៏ល្អក្នុងការបង្កើតមិត្តភាព និងភ្ជាប់ទំនាក់ទំនងជាមួយសហគមន៍មូលដ្ឋាន។ និស្សិតអន្តរជាតិភាគច្រើនត្រូវបានអនុញ្ញាតឱ្យធ្វើការក្នុងអំឡុងពេលសិក្សា ដោយមានលក្ខខណ្ឌថាពួកគេចុះឈ្មោះក្នុងកម្មវិធីសិក្សាពេញម៉ោងដែលមានសិទ្ធិ និងបំពេញតាមលក្ខខណ្ឌអាយុដែលបានកំណត់។

តើនិស្សិតអន្តរជាតិអាចធ្វើការនៅនូវែលសេឡង់បានទេ?

បាន។ និស្សិតអន្តរជាតិអាចធ្វើការនៅនូវែលសេឡង់បាន។ យោងតាមការកែប្រែចុងក្រោយនៃច្បាប់វីសាសិស្សនិស្សិតអាចធ្វើការបានរហូតដល់ 25 ម៉ោងក្នុងមួយសប្តាហ៍ក្នុងអំឡុងពេលសិក្សា និងអាចធ្វើការពេញម៉ោងក្នុងអំឡុងពេលវិស្សមកាលពាក់កណ្តាលឆ្នាំ និងថ្ងៃឈប់សម្រាកបុណ្យណូអែល និងចូលឆ្នាំថ្មី។

ជាទូទៅ អ្នកអាចធ្វើការពេលកំពុងសិក្សាបាន ប្រសិនបើអ្នកកាន់វីសាមួយក្នុងចំណោមវីសាខាងក្រោម៖

• Fee Paying Student Visa

• Pathway Student Visa

• Exchange Student Visa

• English Language Student Visa

• Vocational Trainee Student Visa

• NZ Government Scholarship Student Visa

• Foreign Government Supported Student Visa

• Trafficking Child Victim Student Visa

តើខ្ញុំមានសិទ្ធិធ្វើការជាមួយវីសាសិស្សដែរឬទេ?

សូមចំណាំថា វីសាខ្លះអាចមានលក្ខខណ្ឌ ឬការរឹតបន្តឹងជាក់លាក់ ដែលនឹងត្រូវបានបញ្ជាក់នៅក្នុង eVisa ឬលិខិតវីសារបស់អ្នក។ ជាទូទៅ អ្នកអាចធ្វើការក្រៅម៉ោងបាន ប្រសិនបើអ្នកបំពេញលក្ខខណ្ឌមួយក្នុងចំណោមលក្ខខណ្ឌខាងក្រោម៖

• សិក្សាពេញម៉ោងយ៉ាងតិច 2 ឆ្នាំសិក្សា

• សិក្សាពេញម៉ោងក្នុងកម្មវិធីសញ្ញាបត្រនូវែលសេឡង់កម្រិត 4 ឬខ្ពស់ជាងនេះ នៅលើ New Zealand Qualifications and Credentials Framework (NZQCF)

• សិក្សាពេញម៉ោងដើម្បីអភិវឌ្ឍជំនាញភាសាអង់គ្លេសក្នុងវគ្គសិក្សាដែលបំពេញលក្ខខណ្ឌជាក់លាក់

• សិក្សាពេញម៉ោងយ៉ាងតិច 1 ឆមាស ជាផ្នែកមួយនៃកម្មវិធីផ្លាស់ប្តូរនិស្សិត ឬកម្មវិធី Study Abroad ដែលបានអនុម័ត

ដើម្បីធ្វើការពេញម៉ោងក្នុងអំឡុងពេលវិស្សមកាល អ្នកត្រូវបំពេញលក្ខខណ្ឌទាំងអស់ដូចខាងក្រោម៖

• សិក្សាពេញម៉ោងយ៉ាងតិច 1 ឆ្នាំសិក្សា

• កម្មវិធីសិក្សារបស់អ្នកមានយ៉ាងតិច 120 Credits

• កម្មវិធីសិក្សារបស់អ្នកមានយ៉ាងតិច 2 ឆមាស និងមានរយៈពេលយ៉ាងតិច 8 ខែ

ដើម្បីធ្វើការពេញម៉ោងក្នុងអំឡុងពេលថ្ងៃឈប់សម្រាកបុណ្យណូអែល និងចូលឆ្នាំថ្មី អ្នកត្រូវ៖

• សិក្សាពេញម៉ោង

• មានកម្មវិធីសិក្សាយ៉ាងតិច 2 ឆមាស និងមានរយៈពេលយ៉ាងតិច 8 ខែ

ក្នុងអំឡុងពេលឆមាសសិក្សា

យោងតាមបទប្បញ្ញត្តិវីសាសិស្សបច្ចុប្បន្ន និស្សិតអន្តរជាតិអាចធ្វើការក្រៅម៉ោងបានរហូតដល់ 25 ម៉ោងក្នុងមួយសប្តាហ៍។

ក្នុងអំឡុងពេលវិស្សមកាល

ក្នុងអំឡុងពេលវិស្សមកាលសិក្សា និងថ្ងៃឈប់សម្រាកបុណ្យណូអែល និងចូលឆ្នាំថ្មី អ្នកអាចត្រូវបានអនុញ្ញាតឱ្យធ្វើការពេញម៉ោង។ នៅនូវែលសេឡង់ ការងារពេញម៉ោងមានន័យថាធ្វើការយ៉ាងតិច 30 ម៉ោងក្នុងមួយសប្តាហ៍។

តើនិស្សិតអន្តរជាតិអាចធ្វើការប្រភេទអ្វីខ្លះនៅនូវែលសេឡង់?

និស្សិតអន្តរជាតិមិនអាចធ្វើការជាអ្នករកស៊ីផ្ទាល់ខ្លួនបានទេ។ អ្នកត្រូវធ្វើការឱ្យនិយោជក និងមានកិច្ចសន្យាការងារជាលាយលក្ខណ៍អក្សរ។ ការងារពេញនិយមសម្រាប់និស្សិតរួមមាន៖

• ជំនួយការលក់រាយ

• បុគ្គលិកផ្នែកបដិសណ្ឋារកិច្ច (អ្នកបម្រើអាហារ បារីស្តា)

• ការងាររដ្ឋបាលក្នុងសាកលវិទ្យាល័យ

• គ្រូបង្រៀនឯកជន

• កម្មសិក្សាដែលមានប្រាក់ឈ្នួល

ការងារដែលពាក់ព័ន្ធនឹងការសិក្សារបស់អ្នក

ប្រសិនបើបទពិសោធន៍ការងារជាផ្នែកចាំបាច់នៃកម្មវិធីសិក្សារបស់អ្នក Immigration New Zealand នឹងចេញវីសាសិស្សដែលអនុញ្ញាតឱ្យអ្នកធ្វើការដើម្បីបំពេញតម្រូវការនោះ។ ទោះជាយ៉ាងណា អាជ្ញាធរអន្តោប្រវេសន៍ត្រូវតែជឿជាក់ថាការងារនោះជាតម្រូវការពិតប្រាកដ និងត្រូវបានអនុម័តដោយកម្មវិធីសិក្សា។ ដូច្នេះ វាមានប្រយោជន៍ក្នុងការស្វែងយល់ពីអ្វីដែលជាមុខជំនាញ និងវគ្គសិក្សាដែលត្រូវការនៅក្នុង New Zealand មុនពេលចាប់ផ្តើមវគ្គសិក្សាដែលអ្នកជ្រើស

រើស។

ដើម្បីរក្សាស្ថានភាពស្របច្បាប់របស់អ្នក អ្នកត្រូវគោរពតាមលក្ខខណ្ឌដែលកំណត់ដោយ Immigration New Zealand។ សកម្មភាពខាងក្រោមត្រូវបានហាមឃាត់៖

• ធ្វើការលើសចំនួនម៉ោងដែលបានអនុញ្ញាតក្នុងវីសា

• ធ្វើការជាអ្នករកស៊ីផ្ទាល់ខ្លួន

• ធ្វើការជាអ្នកម៉ៅការឯករាជ្យ (Freelance)

• ផ្តល់សេវាផ្លូវភេទពាណិជ្ជកម្ម ឬវិនិយោគក្នុងអាជីវកម្មប្រភេទនេះ

• បន្តធ្វើការបន្ទាប់ពីវីសាសិស្សផុតសុពលភាព

សិទ្ធិការងាររបស់អ្នកក្នុងនាមជានិស្សិតនៅនូវែលសេឡង់

មនុស្សគ្រប់រូបដែលធ្វើការនៅនូវែលសេឡង់ រួមទាំងនិស្សិតអន្តរជាតិ មានសិទ្ធិការងារមូលដ្ឋាន។

តាមច្បាប់ និយោជករបស់អ្នកត្រូវ៖

• ផ្តល់កិច្ចសន្យាការងារជាលាយលក្ខណ៍អក្សរ

• បង់ប្រាក់ឈ្នួលយ៉ាងតិចតាមអត្រាអប្បបរមា

• ផ្តល់ថ្ងៃឈប់សម្រាកប្រចាំឆ្នាំដែលមានប្រាក់ឈ្នួល

• ផ្តល់ពេលសម្រាក និងពេលបរិភោគអាហារតាមច្បាប់

• ផ្តល់សំណង ឬថ្ងៃឈប់សម្រាកសាធារណៈតាមសិទ្ធិ

• មិនកាត់ប្រាក់ខែដោយគ្មានការយល់ព្រមជាលាយលក្ខណ៍អក្សរ

• ផ្តល់បរិយាកាសការងារដែលមានសុវត្ថិភាព

• មិនរើសអើង

• ប្រព្រឹត្តដោយសុចរិតភាព

ប្រសិនបើអ្នកមានអារម្មណ៍ថានិយោជករបស់អ្នកមិនគោរពតាមកាតព្វកិច្ចទាំងនេះ អ្នកអាចទាក់ទង Ministry of Business, Innovation and Employment តាមលេខ 0800 20 90 20។

ពន្ធ និងហិរញ្ញវត្ថុ៖ អ្វីដែលនិស្សិតធ្វើការគួរដឹង

ស្វែងយល់អំពីលេខ IRD និង PAYE

អ្នកត្រូវការលេខ IRD ដើម្បីធ្វើការនៅនូវែលសេឡង់ ទោះបីជាអ្នកជានិស្សិតអន្តរជាតិក៏ដោយ។ លេខនេះគឺជាលេខសម្គាល់សម្រាប់គោលបំណងពន្ធដែលចេញដោយ Inland Revenue។

អ្នកគួរដាក់ពាក្យសុំលេខ IRD ឱ្យបានឆាប់បន្ទាប់ពីទទួលបានវីសា និងផ្តល់លេខនេះឱ្យនិយោជកមុនពេលចាប់ផ្តើមធ្វើការ។

អ្នកកាន់វីសាសិស្សទាំងអស់ ត្រូវបង់ពន្ធលើប្រាក់ចំណូលរបស់ខ្លួន។ លេខកូដពន្ធរបស់អ្នកនឹងកំណត់ចំនួន PAYE (Pay As You Earn) ដែលនិយោជកត្រូវកាត់ទុក។

អត្រាប្រាក់ឈ្នួលអប្បបរមាសម្រាប់និស្សិតអន្តរជាតិ

ប្រសិនបើអ្នកធ្វើការជាមួយវីសាសិស្ស អ្នកត្រូវទទួលបានប្រាក់ឈ្នួលយ៉ាងតិចតាមអត្រាអប្បបរមាសម្រាប់រាល់ម៉ោងដែលអ្នកធ្វើការ។

អត្រាប្រាក់ឈ្នួលអប្បបរមាសម្រាប់មនុស្សពេញវ័យបច្ចុប្បន្នគឺ NZD$23.15 ក្នុងមួយម៉ោង (មុនបង់ពន្ធ)។ ទោះជាយ៉ាងណា ក្នុងករណីខ្លះ អ្នកអាចទទួលបាន NZD$18.52 ក្នុងមួយម៉ោង (មុនបង់ពន្ធ) ប្រសិនបើអ្នកស្ថិតក្នុងកម្មវិធីបណ្តុះបណ្តាលដែលបានអនុម័ត។

ជាមួយនឹងទេសភាពធម្មជាតិដ៏អស្ចារ្យ និងគ្រឹះស្ថានអប់រំលំដាប់ពិភពលោក នូវែលសេឡង់បានក្លាយជាគោលដៅសិក្សាដ៏ពេញនិយមសម្រាប់និស្សិតអន្តរជាតិដែលកំពុងស្វែងរកការអប់រំគុណភាពខ្ពស់។

មិនថាអ្នកស្រមៃចង់សិក្សានៅ Christchurchឬ Wellington នោះទេ IDP ផ្តល់សេវាប្រឹក្សាដោយឥតគិតថ្លៃ ដើម្បីជួយអ្នកសម្រេចគោលដៅសិក្សារបស់អ្នក។ ចាប់ពីការជ្រើសរើសវគ្គសិក្សាដែលសមស្របរហូតដល់ការគាំទ្រ IELTS យើងផ្តល់ការណែនាំគ្រប់ជំហាន ដើម្បីធានាថាដំណើរសិក្សានៅបរទេសរបស់អ្នកទទួលបានជោគជ័យ។

ត្រៀមខ្លួនសម្រាប់ជំហានបន្ទាប់ហើយឬនៅ? កក់ការប្រឹក្សាដោយឥតគិតថ្លៃថ្ងៃនេះ!