ធ្វើការជាមួយវីសាសិស្សនៅចក្រភពអង់គ្លេស

បានបោះពុម្ព៖ 10 កក្កដា 2026

ការមកសិក្សានៅចក្រភពអង់គ្លេសគឺជាជំហានដ៏សំខាន់មួយក្នុងជីវិតសិក្សារបស់អ្នក។ ទោះជាយ៉ាងណា ការរស់នៅក្នុងប្រទេសដែលមានការអប់រំកម្រិតពិភពលោកក៏អាចមានការចំណាយខ្ពស់ផងដែរ។ ដូច្នេះ និស្សិតជាច្រើនជ្រើសរើសធ្វើការក្រៅម៉ោងក្នុងអំឡុងពេលសិក្សា ដើម្បីជួយទ្រទ្រង់ការចំណាយរស់នៅ។ លើសពីនេះ ការងារក្រៅម៉ោងក៏ជួយឱ្យអ្នកទទួលបានបទពិសោធន៍ការងារអន្តរជាតិ និងបង្កើតប្រវត្តិរូបការងារ (CV) ដែលទាក់ទាញសម្រាប់និយោជកនៅជុំវិញពិភពលោក។

ជាសំណាងល្អ រដ្ឋាភិបាលចក្រភពអង់គ្លេសទទួលស្គាល់សារៈសំខាន់នៃការងារសម្រាប់និស្សិតអន្តរជាតិ ហើយអនុញ្ញាតឱ្យនិស្សិតភាគច្រើនអាចធ្វើការក្រៅម៉ោងពេលកំពុងសិក្សាបាន។

តើនិស្សិតអន្តរជាតិអាចធ្វើការនៅចក្រភពអង់គ្លេសបានទេ?

បាន។ និស្សិតអន្តរជាតិអាចធ្វើការនៅចក្រភពអង់គ្លេសក្នុងអំឡុងពេលសិក្សាបាន។ ប្រសិនបើអ្នកកាន់ ទិដ្ឋាការសិស្សរបស់ចក្រភពអង់គ្លេស (ពីមុនហៅថា Tier 4) វីសារបស់អ្នកជាទូទៅនឹងមានសិទ្ធិធ្វើការរួមបញ្ចូលស្រាប់ ដែលអនុញ្ញាតឱ្យអ្នកបន្តការសិក្សា និងអភិវឌ្ឍបទពិសោធន៍ការងារបានក្នុងពេលតែមួយ។

តើខ្ញុំមានសិទ្ធិធ្វើការជាមួយវីសាសិស្សដែរឬទេ?

ទោះបីនិស្សិតភាគច្រើនមានសិទ្ធិធ្វើការក៏ដោយ ការមានសិទ្ធិនេះអាស្រ័យលើលក្ខខណ្ឌសំខាន់ៗមួយចំនួន៖

• ស្ថាប័នឧបត្ថម្ភ (Sponsor Status): អ្នកត្រូវសិក្សានៅស្ថាប័នអប់រំកម្រិតឧត្តមសិក្សា (HEP) ដែលមាន “track record of compliance”

• កម្រិតសិក្សា: អ្នកត្រូវចុះឈ្មោះសិក្សាពេញម៉ោងក្នុងកម្មវិធីថ្នាក់បរិញ្ញាបត្រ ឬខ្ពស់ជាងនេះ (RQF Level 6 / SCQF Level 9)

• ការអនុញ្ញាតក្នុងវីសា: BRP ឬ eVisa របស់អ្នកត្រូវបញ្ជាក់ថាអនុញ្ញាតឱ្យធ្វើការ

• អាយុ: អ្នកត្រូវមានអាយុយ៉ាងតិច 16 ឆ្នាំ ដើម្បីអាចធ្វើការក្រៅម៉ោងបាន

តើនិស្សិតអន្តរជាតិអាចធ្វើការបានប៉ុន្មានម៉ោងនៅចក្រភពអង់គ្លេស?

ដើម្បីធានាថាអ្នកផ្តោតលើការសិក្សា ក្រសួងមហាផ្ទៃចក្រភពអង់គ្លេស (UK Home Office) បានកំណត់ចំនួនម៉ោងធ្វើការអតិបរមាសម្រាប់និស្សិតអន្តរជាតិ។

ក្នុងអំឡុងពេលសិក្សា

ក្នុងអំឡុងពេលឆមាសសិក្សា អ្នកអាចធ្វើការបាន រហូតដល់ 20 ម៉ោងក្នុងមួយសប្តាហ៍។ នេះគឺជាកម្រិតអតិបរមាក្នុងរយៈពេល 7 ថ្ងៃ ដែលចាប់ផ្តើមពីថ្ងៃចន្ទ។

មានន័យថា អ្នកមិនអាចបូកសរុបម៉ោងការងាររវាងសប្តាហ៍បានទេ (ឧទាហរណ៍ ធ្វើការ 30 ម៉ោងសប្តាហ៍នេះ និង 10 ម៉ោងសប្តាហ៍ក្រោយ) ដូច្នេះការរៀបចំកាលវិភាគឱ្យបានល្អគឺមានសារៈសំខាន់ណាស់។

ក្នុងអំឡុងពេលវិស្សមកាល

នៅពេលសាកលវិទ្យាល័យបិទវិស្សមកាលជាផ្លូវការ ដូចជាបុណ្យណូអែល បុណ្យ Easter ឬវិស្សមកាលរដូវក្តៅ អ្នកអាចធ្វើការពេញម៉ោងបាន (ជាទូទៅរហូតដល់ 40 ម៉ោងក្នុងមួយសប្តាហ៍)។ នេះជាឱកាសល្អសម្រាប់សន្សំប្រាក់ ឬទទួលយកកម្មសិក្សាដែលមានការងារច្រើនជាងមុន។

មានឱកាសការងារជាច្រើនសម្រាប់និស្សិតអន្តរជាតិ រួមមាន៖

• ផ្នែកលក់រាយ និងបដិសណ្ឋារកិច្ច: ហាងលក់ទំនិញ កាហ្វេ និងហាងល្បីៗ

• ការងារនៅសាកលវិទ្យាល័យ: ជំនួយការបណ្ណាល័យ អ្នកណែនាំនិស្សិត ឬធ្វើការជាមួយសហភាពនិស្សិត

• បង្រៀនឯកជន: គណិតវិទ្យា វិទ្យាសាស្ត្រ ឬភាសា

• កម្មសិក្សា (Internships): ទទួលបានបទពិសោធន៍វិជ្ជាជីវៈក្នុងមុខជំនាញរបស់អ្នក

សូមចំណាំថា ច្បាប់វីសាសិស្សរបស់ចក្រភពអង់គ្លេស មិនអនុញ្ញាតឱ្យធ្វើការឯករាជ្យ (Freelance) ធ្វើអាជីវកម្មផ្ទាល់ខ្លួន ឬការងារ Gig Work តាមអនឡាញឡើយ។ អ្នកត្រូវធ្វើការក្រោមកិច្ចសន្យាជាមួយនិយោជកផ្លូវការ។

ការងារដែលពាក់ព័ន្ធនឹងមុខវិជ្ជាសិក្សា

ប្រសិនបើកម្មវិធីសិក្សារបស់អ្នកមានការអនុវត្តការងារ ឬកម្មសិក្សាដែលជាផ្នែកចាំបាច់ និងមានការវាយតម្លៃជាផ្លូវការ ម៉ោងទាំងនេះជាទូទៅមិនត្រូវបានរាប់បញ្ចូលក្នុងកម្រិត 20 ម៉ោងក្នុងមួយសប្តាហ៍ទេ ដរាបណាកម្មសិក្សាមិនលើសពី 50% នៃរយៈពេលសិក្សាសរុប។

ដើម្បីរក្សាវីសាសិស្សរបស់អ្នកឱ្យមានសុពលភាព សូមជៀសវាង៖

• ធ្វើការលើស 20 ម៉ោងក្នុងមួយសប្តាហ៍ក្នុងអំឡុងពេលសិក្សា

• ធ្វើការពេញម៉ោងជាអចិន្ត្រៃយ៍ លុះត្រាតែប្តូរទៅវីសាប្រភេទផ្សេង

• ធ្វើជាអត្តពលិកអាជីព គ្រូបង្វឹកកីឡា ឬអ្នកសិល្បៈអាជីព

• ចាប់ផ្តើមធ្វើការមុនពេលកម្មវិធីសិក្សាចាប់ផ្តើម

• ធ្វើអាជីវកម្មផ្ទាល់ខ្លួន ឬ Freelance

សិទ្ធិការងាររបស់អ្នកក្នុងនាមជានិស្សិតនៅចក្រភពអង់គ្លេស

ទោះបីអ្នកមិនមែនជាបុគ្គលិកពេញម៉ោងក៏ដោយ អ្នកនៅតែមានសិទ្ធិការងារដូចជា៖

• ប្រាក់ឈ្នួលអប្បបរមាជាតិ: គិតត្រឹមខែមេសា ឆ្នាំ 2025 គឺ £12.71 ក្នុងមួយម៉ោង សម្រាប់អ្នកអាយុ 21 ឆ្នាំឡើងទៅ និង £10 សម្រាប់អ្នកអាយុ 18–20 ឆ្នាំ

• កិច្ចសន្យាការងារជាលាយលក្ខណ៍អក្សរ

• សិទ្ធិឈប់សម្រាកដោយមានប្រាក់ឈ្នួល

• បរិយាកាសការងារមានសុវត្ថិភាព និងគ្មានការរើសអើង

ប្រសិនបើអ្នកមានអារម្មណ៍ថាសិទ្ធិរបស់អ្នកត្រូវបានរំលោភ អ្នកអាចទាក់ទង ACAS (acas.org.uk) ឬ National Minimum Wage Helpline ដើម្បីទទួលបានការណែនាំដោយសម្ងាត់។

ពន្ធ និងហិរញ្ញវត្ថុ៖ អ្វីដែលនិស្សិតធ្វើការគួរដឹង

មុនពេលចាប់ផ្តើមការងារដំបូង អ្នកត្រូវដាក់ពាក្យសុំ National Insurance (NI) Number តាមគេហទំព័រ gov.uk។

លេខ NI គឺជាលេខសម្គាល់ផ្ទាល់ខ្លួនសម្រាប់ប្រព័ន្ធពន្ធ និងធានាថាប្រាក់ចំណូល និងការបង់ពន្ធរបស់អ្នកត្រូវបានកត់ត្រាត្រឹមត្រូវ។

នៅចក្រភពអង់គ្លេស មនុស្សគ្រប់រូបមាន Personal Allowance ដែលមានន័យថា អ្នកនឹងចាប់ផ្តើមបង់ពន្ធលុះត្រាតែប្រាក់ចំណូលប្រចាំឆ្នាំរបស់អ្នកលើសកម្រិតដែលបានកំណត់។ ដោយសារនិស្សិតភាគច្រើនធ្វើការក្រៅម៉ោង ឬធ្វើការតែរយៈពេលខ្លី អ្នកអាចមានសិទ្ធិទទួលប្រាក់ពន្ធត្រឡប់មកវិញ (Tax Refund) ។

សូមរក្សាទុកឯកសារ P45 និង P60 របស់អ្នកឱ្យបានល្អ ព្រោះវាជាឯកសារសំខាន់សម្រាប់ការទាមទារប្រាក់ពន្ធត្រឡប់មកវិញ។

ការសម្របខ្លួនទៅនឹងច្បាប់ និងប្រព័ន្ធថ្មីអាចមានភាពស្មុគស្មាញ ប៉ុន្តែអ្នកមិនចាំបាច់ធ្វើវាតែម្នាក់ឯងទេ! អ្នកប្រឹក្សាជំនាញរបស់ IDP អាចជួយអ្នកស្វែងរកវគ្គសិក្សា និងសាកលវិទ្យាល័យដែលសមស្របបំផុតទៅនឹងគោលដៅអាជីពរបស់អ្នក។

យើងផ្តល់សេវាប្រឹក្សាដោយឥតគិតថ្លៃ ចាប់ពីការដាក់ពាក្យសិក្សា ការយល់ដឹងអំពីវីសា រហូតដល់ថ្លៃសិក្សានៅចក្រភពអង់គ្លេស។

លើសពីនេះ ដោយសារភាសាអង់គ្លេសគឺជាគន្លឹះសម្រាប់ឱកាសទាំងនេះ យើងក៏អាចជួយអ្នកត្រៀមប្រឡង IELTS តាមរយៈធនធានត្រៀមប្រឡងដ៏ទូលំទូលាយរបស់យើងផងដែរ។